Ministria e Punëve të Brendshme, me përkrahjen e OSBE-së ka mbajtur takimin e përvitshëm me kryetarët e komunave të cilët janë edhe udhëheqësit e Këshillave Komunalë për Siguri në Bashkësi.

Ministri i Punëve të Brendshme, Flamur Sefaj tha me këtë rast se krijimi i një ambienti të sigurtë për qytetarët e Kosovës është një nga prioritetet e planit të punës së Qeverisë.

Sefaj tha se komunat duhet të themelojnë Këshillat Komunalë për siguri në Bashkësi, shkruan arbresh.info.

“Këto Këshilla përmes forumeve të sigurisë arrijnë t’i përçojnë zërat e grupeve të ndryshme rreth sigurisë. Funksionimi i këtyre forumeve ndikon edhe në formimin e besimit mes qytetarëve dhe të zgjedhurve e të tyre”, ka thënë Sefaj.

Ai ka bërë të ditur se sa i përket luftimit të terrorizmit dhe radikalizmit, MPB është në fazën finale të krijimit të Divizionit për parandalimin dhe riintegrimin e personave të radikalizuar

“MPB është në fazën finale të krijimi të një divizioni të ri që do të thirret Divizioni për parandalim dhe riintegrim të personave të radikalizuar për personat e kthyer nga zonat e konfliktit dhe të kthyer nga burgu pas dënimeve të Gjykatës”, është shprehur ministri Sefaj.

Sipas tij, MPB me vendim ka themeluar një trup koordinuese ndërqeveritare që ka për detyrë menaxhimin e procesit të kthimit të qytetarëve nga zonat e konfliktit./arbresh.info/